Germê Welatê Mezopotamya zahf veşiyo. Roj beno adir, kewno gandê kesî. Amnanî germey roj bi roj bena wêşi u derece wijêno 45, belki ju fin beno 50.
Laberê ewro dîrê rojyo, germey tay şikyaya. Ayam bîyo honik, dem dem vayêro nerb û zek honik wijêno. Hele şew, wera şewra honikey xue bellî kenna, zarra kena honik.
Dişmişîbê, adirî miyandi, honikey! Çi çiyêro ecêb.
İnsan na honikeyra beno şa, xue weradano virarda honikey.
Honikti Rakewtayiş beno kesirê şîrin û weş.
Labrê ez rakevtayişira tay dûrya…Ez xue zana nêzana rakevtayişêmi, rakewtayişê luwano. Taynekê rojnaney u reqi bobi, ez paryaya.
Germdi xura hewn çınya kesirê, honıkeydı zi, ez nê rakevna. Ez qayıla kı honıkê amnanê aya rawêrna.
Qandê coy ez ewro tijya bîya aya. Wengê mirîcika, wengê makîna kewto pê miyan.
Çayo ki mayê roşenê, apartmano, apartmanêno kehano. Belki 40, belki 50 ser rawey virazyayo, çoşmeycızi wunî.
Apartumanê na suk, bahçeyci dar û bero. Qandê coy teyr û miricıkê kemi nê benê darandêcira.
Weri key ma herinrabi, desê siyara wiraştebi û serê desa magara girotebi. Serê mağa zi herribi. Werê ney 30 ser. Ma banandı herinandi jiyanêro taybet ravêrnayê.
Ez hergı roj rew biyê aya û mi çımê xue akardı, nê akerdi mağê amordı.
Hırgı roj, mi rojê nêva ez mağa nê amora.
Qandê çıçi mi winî kerdê ezî nêzana.
Xuera ez, zahf çî nêzana, nêzanayeya.
Serrê rawerdi, ez biya gird, por bı sipe, sukî mi virnay, ez welatra kewta durî, banê herini rijyay, betonra apartamani kewti jiyandı ma.
Apartmanê çiyêrê ecêbi. Hergı cayci beton, lepê her çinya zerrandi.
Herrı hewşandı apartmanandi belki tay bibo. Bereket apartmano ki mayê manenê, hewşê û bahçeycı herra û dari karıteyê.
İnsan boya dar u beri tay gêno.
Apartmanê, zey hepso akardeyê. İnsan şeno kêberi xue sero akero u bivijyo tever. Pêsoro, pesêro desê û odey .
Nê saatandı zaf çi yeno mı virê.
May u pi mı yeno mı virê.
Dew u welat hewnê mi vîrî…
Mi va ya, nê saatandi hirgı çi yeno bu virî.
Virêmi serredimidı benê talazik, benê vayêro pêt...